দুঃখবৰ! জ্যেষ্ঠ সাংবাদিক বসন্ত কুমাৰ শৰ্মাৰ ৪৩ বছৰ বয়সত অকাল মৃত্যু; হৃদৰোগত আক্ৰান্ত হৈ শেষ নিশ্বাস ত্যাগ সাংবাদিকগৰাকীৰ

সাংবাদিক বসন্ত কুমাৰ শৰ্মাৰ অকাল মৃত্যু (Senior Journalist Basanta Kumar Sharma Passed Away) ৷ ৪৩ বছৰ বয়সত শৰ্মাই শেষ নিশ্বাস ত্যাগ কৰে সাংবাদিকগৰাকীয়ে ৷ নগাঁও চহৰৰ সমীপৱৰ্তী দক্ষিণপাট (Dakshinpat Near Nagaon City) নিবাসী বসন্ত কুমাৰ শৰ্মাই বৃহস্পতিবাৰে বিয়লি প্রায় ২ বাজি ৪০ মিনিটত আকস্মিকভাবে হৃদৰোগত আক্ৰান্ত হৈ অকাল মৃত্যুক সাৱটে।

সাংবাদিক শৰ্মাৰ মৃত্যুৰ বাতৰি প্ৰচাৰ হোৱাত শোঁকৰ ছাঁ পৰিছে নগাঁৱত ৷ নগাঁও জিলাৰ (Nagaon District) দক্ষিণপাটৰ পৰা সাংবাদিকতাৰ জীৱন আৰম্ভ কৰা বসন্ত কুমাৰ শৰ্মা আকস্মিক মৃত্যুত ম্ৰিয়মান হৈ পৰিছে নগাঁৱৰ সাংবাদিকসকল ৷

জানিব পৰা মতে, নিজ বাসগৃহতে বুধবাৰে নিশা উচ্চ ৰক্তচাপত আক্ৰান্ত হোৱা সাংবাদিকজনক নগাঁৱৰ এখন ব্যক্তিগত খণ্ডৰ চিকিৎসালয়ত ভৰ্তি কৰা হয় যদিও কোনো সুফল লাভ নকৰাত বৃহস্পতিবাৰে উন্নত চিকিৎসাৰ বাবে এম্বুলেঞ্চেৰে গুৱাহাটীলৈ প্ৰেৰণ কৰা হয়। কিন্তু গুৱাহাটী অভিমুখে নি থকা অৱস্থাতে সাংবাদিক শৰ্মাই শেষ নিশ্বাস ত্যাগ কৰে।

উল্লেখ্য যে প্ৰয়াত শৰ্মাই পোন প্ৰথমে ‘আজিৰ বাতৰি’ৰ জৰিয়তে ১৯৯৬ত সংবাদ সেৱা আৰম্ভ কৰিছিল। পৰৱৰ্তী সময়ত দৈনিক অগ্ৰদূতত উপ সম্পাদক, প্ৰাইম নিউজত চীফ ৰিপ’ৰ্টাৰ, প্ৰাগ নিউজত চীফ ৰিপ’ৰ্টাৰ হিচাপে কাম কৰিছিল ৷

শেহতীয়াকৈ এটা নিউজ প’ৰ্টেলৰ সৈতে জড়িত আছিল তেওঁ। মৃত্যুৰ সময়ত তেওঁ মাতৃ, পত্নী, দুগৰাকী কণমানি কন্যা আৰু দুজন ভ্ৰাতৃক এৰি থৈ যায়।

সাংবাদিকজনৰ মৃত্যুত জ্যেষ্ঠ সাংবাদিক কনকসেন ডেকা, নগাঁৱৰ বিধায়ক ৰূপক শর্মা, নগাঁও জিলা বাৰ্তাজীৱী সংঘ, নগাঁও ইলেক্ট্রনিক মিডিয়া এছ’চিয়েছন, নগাঁও প্ৰেছ ক্লাবৰ লগতে বিভিন্ন দল-সংগঠনে গভীৰ শোক প্ৰকাশ কৰাৰ লগতে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰিছে।

Photo & Input: ৱাহিদুদ জামান

আৰু পঢ়কঃ https://khatangkhobor.com/miscellaneous/health/health-tips-side-effects-of-drinking-water-from-plastic-bottles/12520/