মাৰ্কিন বিজ্ঞানী কাটালিন কাৰিকো আৰু ড্ৰিউ ৱেইজমেনলৈ চিকিৎসা বিজ্ঞানৰ নোবেল বঁটা !!!

অছলো :  নিউক্লিঅ’চাইড  বেছ পৰিৱৰ্তন সম্পৰ্কীয় আৱিষ্কাৰৰ বাবে ২০২৩ বৰ্ষৰ চিকিৎসা বিজ্ঞানৰ নোবেল বঁটা মাৰ্কিন বিজ্ঞানী কাটালিন কাৰিকো (Katalin Kariko) আৰু ড্ৰিউ ৱেইজমেনলৈ (Drew Weissman) আগবঢ়োৱা হৈছে।

এই দুয়োগৰকী বিজ্ঞানীৰ আৱিষ্কাৰ mRNA প্ৰযুক্তিৰ জৰিয়তে Covid-19 ভেকচিন উদ্ভাৱনৰ পথ মুকলি হৈছিল।

১৯৫৫ চনত শ্ব’লনকত জন্মগ্ৰহণ কৰা কাটালিন কাৰিকো (Katalin Kariko) হাংগেৰিৰ  ছেজড বিশ্ববিদ্যালয়ৰ অধ্যাপিকা আৰু পেনচিলভেনিয়া বিশ্ববিদ্যালয়ৰ পেৰেলমেন স্কুল অৱ মেডিচিনৰ সহযোগী অধ্যাপিকা ।

১৯৫৯ চনত মেছাচুচেটছৰ লেক্সিংটনত  জন্মগ্ৰহণ কৰা ড্ৰিউ ৱেইজমেনে (Drew Weissman)  ১৯৯৭ চনত  RNA আৰু জন্মগত প্ৰতিৰোধ ক্ষমতা জীৱবিজ্ঞান অধ্যয়নৰ বাবে পেনচিলভেনিয়া বিশ্ববিদ্যালয়লৈ গৈ নিজৰ পৰীক্ষাগাৰ আৰম্ভ কৰে। বৰ্তমান তেওঁ বিশ্ববিদ্যালয়খনৰ ভেকচিন গৱেষণাৰ ৰবাৰ্টছ ফেমিলিৰ অধ্যাপক। (Roberts Family Professor in Vaccine Research)

নোবেল এছেম্বলিৰ তৰফৰ পৰা কোৱা হৈছে যে কাটালিন কাৰিকো (Katalin Kariko) আৰু ড্ৰিউ ৱেইজমেনৰ (Drew Weissman) যুগান্তকাৰী অনুসন্ধানত শৰীৰৰ ৰোগ প্ৰতিৰোধ ক্ষমতাৰ সৈতে RNA ৰ প্ৰকৃত সম্পৰ্ক  কি – সেই ধাৰণাটোৱেই সলনি হৈ গৈছিল।

২০০৫ চনতে এই দুই বিজ্ঞানীৰ গৱেষণাপত্ৰ প্ৰকাশ পাইছিল। কিন্তু সেই সময়ত এই গৱেষণা বিজ্ঞানীসকলৰ চকুত পৰা নাছিল। কিন্তু Covid মহামাৰীৰ সময়ত এই ৰোগৰ আগতীয়া প্ৰতিৰোধ ব্যৱস্থা হিচাপে Covid ভেকচিন আৱিষ্কাৰৰ বাবে বিশ্বৰ বিজ্ঞানীসকল উবুৰি খাই পৰাৰ সময়তে এই দুগৰাকী বিজ্ঞানীৰ নিউক্লিঅ’চাইড  বেছ পৰিৱৰ্তন সম্পৰ্কীয়  আৱিষ্কাৰত সকলোৰে দৃষ্টি পৰে আৰু এই গৱেষণাৰ ফলাফল ব্যৱহাৰ কৰি Covid ভাইৰাছ প্ৰতিৰোধী mRNA ভেকচিন প্ৰস্তুত কৰাটো সম্ভৱ হৈ পৰে।

ফলত ২০২০ চনৰ Covid মহামাৰীৰ সময়ত Covid প্ৰতিৰোধী  mRNA দুটা ভেকচিনে কোটি কোটি লোকৰ জীৱন ৰক্ষা কৰে।

বৰ্তমানলৈকে ১৯০১ চনৰ পৰা শৰীৰবিজ্ঞান বা চিকিৎসা বিজ্ঞানৰ ১১৩টা নোবেল বঁটা প্ৰদান কৰা হৈছে ইয়াৰে ১২টা মহিলাক প্ৰদান কৰা হৈছে।

এতিয়ালৈকে আটাইতকৈ কম বয়সীয়া চিকিৎসা বিজ্ঞান বঁটা বিজয়ী ফ্ৰেডেৰিক জি বেণ্টিং (Frederick G. Banting),  ৩২ বছৰ বয়সত ইনচুলিন (insulin) আৱিষ্কাৰৰ বাবে ১৯২৩ চনত চিকিৎসা বিজ্ঞানৰ নোবেল বঁটা লাভ কৰিছিল।