পেৰিছত অলিম্পিকৰ বৰ্ণিল উদ্বোধন …

‘পৃথিৱীৰ সৰ্বশ্ৰেষ্ঠ ক্ৰীড়া প্ৰদৰ্শনৰ মঞ্চ’  অলিম্পিক । বহু অপেক্ষাৰ অন্তত ২৬ জুলাই শুকুৰবাৰে নিশা ১১ বজাৰ পৰা অৱশেষত আৰম্ভ হ’ল অলিম্পিকৰ মুকলি অনুষ্ঠান। কিন্তু এইবাৰ ষ্টেডিয়ামত নহয়, অলিম্পিকৰ মুকলি অনুষ্ঠান কবিতা বা প্ৰেমৰ নগৰ পেৰিছৰ ছেইন নদীৰ ওপৰত অনুষ্ঠিত কৰা হয়।

মুকলি অনুষ্ঠানৰ আৰম্ভণিতে নদীৰ ওপৰত থকা দলঙৰ পৰা নীলা-বগা-ৰঙা ৰং বিয়পি পৰিল। যিটো ফ্ৰান্সৰ জাতীয় পতাকাৰ ৰং। তাৰ পিছত প্ৰৱেশ কৰিলে গ্ৰীচে। ইয়াৰ পিছত আফগানিস্তান, দক্ষিণ আফ্ৰিকা, জাৰ্মানী, ব্ৰাজিল, বাংলাদেশৰ নাৱে এখন এখনকৈ নদীৰ পাৰত পেৰেডত অংশগ্ৰহণ কৰে। আছিল নাও ভৰ্তি শৰণাৰ্থী খেলুৱৈৰ দলো।

তাৰ মাজতে লেডী গাগাই গান গাইছিল। নদীৰ পাৰত সাংস্কৃতিক অনুষ্ঠান অনুষ্ঠিত হৈছিল। এজন মুখা পিন্ধা লোকে ফ্ৰান্সৰ বিভিন্ন ঐতিহাসিক স্থানৰ মাজেৰে অলিম্পিক শিখা কঢ়িয়াই লৈ যায়। পটভূমিত আৱদ্ধ হৈ পৰিল ফ্ৰান্সৰ ইতিহাস। বিখ্যাত মনালিছা চুৰিৰ ঘটনাও।

তাৰ পিছত আহিল বহু প্ৰতীক্ষিত মুহূৰ্তটো। যাৰ বাবে দেশবাসীয়ে অপেক্ষা কৰি আছিল। ছেইন নদীত ভাৰতীয় নাওৰ প্ৰৱেশ। সকলোৰে সন্মুখত জাতীয় পতাকা লৈ উপস্থিত পিভি সিন্ধু। তেওঁৰ আৰু শৰথ কমলৰ ওপৰত ত্ৰিৰংগা পতাকা কঢ়িয়াই নিয়াৰ দায়িত্ব। যোৱা তিনি বছৰ ধৰি ভাৰতীয় খেলুৱৈসকলে অপেক্ষা কৰি থকা দিনটো অৱশেষত আহিল। সকলোৰে চকু উত্তেজনাৰে ভৰি পৰিল। হাতত সৰু সৰু জাতীয় পতাকা।

উদ্বোধনী অনুষ্ঠানত ভাৰতৰ পৰা মুঠ ৭৮ গৰাকী এথলিটে অংশগ্ৰহণ কৰিছে। বগা কুৰ্তা-পাইজামা পিন্ধা পুৰুষৰ দল এটা। মহিলাসকলে বগা শাৰী পিন্ধিছে। কিন্তু ইয়াত দেশৰ পতাকাৰ স্পৰ্শও আছে। ভাৰতীয় দলটোৱে এখন নাওত উঠি ৰাষ্ট্ৰীয় পতাকা উত্তোলিত কৰি আনুষ্ঠানিকভাৱে এইবাৰৰ অলিম্পিক অভিযান আৰম্ভ কৰে।

অৱশ্যে ইয়াৰ পিছত পিভি সিন্ধুৰ বাবে আৰম্ভ হ’ব প্ৰকৃত পৰীক্ষা। যদিও আজিৰ দিনটোতে আনুষ্ঠানিকভাৱে অলিম্পিক আৰম্ভ হৈছে, ইতিমধ্যে কেইবাটাও ইভেণ্ট আৰম্ভ হৈছে। ইয়াৰ ভিতৰত ভাৰতৰ পুৰুষ আৰু মহিলা দলে প্ৰথম ৰাউণ্ডত আৰ্চাৰীত যোগ্যতা অৰ্জন কৰি কোৱাৰ্টাৰ ফাইনেলত প্ৰৱেশ কৰিছে। ফলত দেশবাসীৰ আশা ক্ৰমান্বয়ে বাঢ়িছে। অনাগত দিনত ইয়াৰ বাবে যুঁজিব ১১৭ গৰাকী ভাৰতীয় তাৰকাই।

২০২৪ চনৰ গ্ৰীষ্মকালীন অলিম্পিক, আনুষ্ঠানিকভাৱে গেমছ অৱ দ্য XXXIII অলিম্পিয়াড আৰু আনুষ্ঠানিকভাৱে পেৰিছ ২০২৪ নামেৰে ব্ৰেণ্ড কৰা আন্তঃৰাষ্ট্ৰীয় বহু ক্ৰীড়া অনুষ্ঠান ১১ আগষ্টলৈকে ফ্ৰান্সত অনুষ্ঠিত হ’ব।

এইবাৰৰ অলিম্পিক ২০২৪ ৰ মূলমন্ত্ৰ (Motto) হ’ল: Games wide open (French: Ouvrons grand les Jeux)