সম্প্ৰতি গোলাঘাটত হাতী-মানুহৰ সংঘাত চৰম পৰ্যায়ত উপনীত হোৱাৰ সময়তে বনৰীয়া হাতীৰ স’তে সহাৱস্থানৰ এক অন্যতম নিদৰ্শন দাঙি ধৰিছে এজন যুৱকে ।
গোবিন্দপুৰ চাহ বাগিচাৰ শ্ৰমিক লাইনৰ নিবাসী যুৱক ভৃগুনাথ লোহাৰে তেওঁৰ ২৪ সংখ্যক জন্মদিনত আজি গাঁৱৰ একাংশ যুৱকৰ স’তে মিলি কলগছ সংগ্ৰহ কৰে । ইয়াৰ পাছত লেটেকুজান চাহ বাগিচাত আজি কিছুদিনৰ পৰা আশ্ৰয় লৈ থকা এটা হাতীৰ জাকৰ কাষলৈ অতি কষ্টৰ মাজেৰে কিছুদূৰ গাড়ীৰে আৰু কিছুদূৰ কান্ধত তুলি নিয়ে । কণ কণ পোৱালীসহ হাতীৰ জাকটোৱেও কলগছ পৰম তৃপ্তিৰে খোৱা দেখা যায় ।
খাদ্যৰ সংকটত পৰি জনাঞ্চলত এতিয়া যেনিয়ে তেনিয়ে বিচৰণ কৰিবলৈ লৈছে বনৰীয়া হাতীয়ে । ইয়াৰ ফলত নুমলীগড়ত নিতৌ সৃষ্টি হয় হাতী-মানুহৰ সংঘাতৰ ।
এনে সময়ত মানুহে সংঘাতৰ পৰিৱৰ্তে হাতীৰ স’তে সহাৱস্থান কৰাৰ প্ৰয়োজনীয়তা আহি পৰাৰ সময়তে গোবিন্দপুৰ চাহ বাগিচাৰ যুৱক ভৃগুনাথ লোহাৰে লোৱা পদক্ষেপৰ বিভিন্ন মহলে শলাগ লৈছে ।
Discussion about this post